Чăваш Ен цифра аталанăвĕн, информаци политикипе массăллă коммуникацисен министрĕ Кристина Майнина паян ĕçлĕ çул çÿревпе Муркаш районĕнче пулчĕ.

Министр малтанах район администрацийĕн пуçлăхĕпе Ростислав Тимофеевпа тата Муркаш район хаçачĕн тĕп редакторĕпе Анатолий Тихоновпа тĕл пулчĕ. Вĕсем çыхăнупа цифровизаци, çавăн пекех вырăнта радио йĕркелессин ыйтăвĕсене сÿтсе яврĕç.

Район хаçачĕн коллективĕпе тĕл пулнă май, Кристина Майнина республикăри массăллă коммуникаци хатĕрĕсен пĕтĕмĕшле аталанăвĕ çинче чарăнса тăчĕ. Муркаш район хаçачĕ пысăк тиражпа тухса тăма пултарни, редакци Муркаш почтамчĕпе тачă çыхăнса ĕçлени ытти редакцисемшĕн тĕслĕх пулмаллине палăртрĕ. Министр журналистсен ыйтăвĕсене те хуравларĕ.

Наталия  НИКОЛАЕВА