Кăçал Нискасси шкулĕ Раççей шайĕнче 1000000 тенкĕ грант тивĕçрĕ. «Музей: перезагрузка» проект шайĕнче нумаях пулмасть эпир çамрăк архивариуссемпе – 8 – 9 классенче вĕренекенсемпе – Муркаш округĕн архивне çитсе килтĕмĕр. Кунта пирĕнпе архив ĕçченĕсем «Семейный ар­хивариус» ăсталăх сехечĕ ирттерчĕç.

Вĕренекенсемшĕн кунти ĕç питĕ кăсăклă иртрĕ. Ача­сем авалхи чăн документсемпе паллашма пултарчĕç. Архив ĕçченĕсем документсене мĕнле упрамал­ли пирки, фондпа мĕнле ĕçлемелли çинчен каласа кăтартрĕç. Тăван çĕршывăн Аслă вăрçине хутшăннă çынсем, Çар ĕçĕсен ветеранĕсем, тыл ĕçченĕсем пир­ки информацие мĕнле шырамалли уйрăмах кăсăклă пулчĕ пирĕншĕн.

Пирĕн çамрăк тĕпчевçĕсем архив описĕсене вулама, кирлĕ документсене тупма, информацин пĕрремĕш çăл куçĕпе ĕçлеме, запроса тĕрĕс çырма, çемье ре­ликвине тишкерме хăнăхрĕç, истори докуменчĕсене упрани пысăк пĕлтерĕшлине пĕлчĕç.

Ăсталăх сехечĕ Муркаш округĕн архивĕпе – проек­тăн официаллă партнерĕпе – ĕçлĕ килĕшÿ туни уйрă­мах паха пулчĕ пирĕншĕн. Çитес вăхăтра пире пĕрле­хи шырав ĕçĕ, документсене цифрăласси, шкулти Çар мухтавĕн залне экспозицисемпе пуянлатасси кĕтет. Çамрăк архивариуссем çĕнĕ шухăшпа, пĕлÿпе таврăн­чĕç.

Олеся ДМИТРИЕВА, шкул директорĕн воспитани енĕпе ĕçлекен советникĕ.