Коронавируса асăрхаттарассипе ĕçлекен республикăри оперативлă штаб ларăвĕнче Роспотребнадзорăн Чăваш Енри управлений­ĕн ертÿçи Надежда Луговская çитес Çимĕ­кре çăва çине каяссинчен чару пурри пирки асăрхаттарнă. Çакăн пирки çынсене маларах пĕлтермеллине палăртнă. Вăл çăвасем çинче харпăр хăйĕн гигиенине пăхăнмалли майсем çуккине, çынсем унта илсе пыракан апат-çимĕçпе пĕр-пĕрне сăйланине каланă. Çавна май коронавирус тăруккăн сарăлма пултарас хăрушлăх пысăккине палăртнă. Республикăра вара, ертÿçĕ пĕлтернĕ тăрăх, 944 çăва.

Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев Надежда Лугов­скаян сăмахĕпе килĕшнĕ. Чару пирки çын­сене смс-хыпарпа пĕлтерес ĕçе йĕркелеме каланă.

Кунсăр пуçне çитес канмалли кунсенче çынсен чиркÿсене каяссинчен те тытăнса тă­малла. Асăрхануллă пулмалла тата йышăн­нă мерăсене пăхăнмалла.

Аса илтеретпĕр, апрелĕн 14-мĕшĕнчен пуçласа уйрăм хушу пуличчен Олег Ни­колаевăн 92 номерлĕ «О комплексе огра­ничительных и иных мероприятий по про­тиводействию распространению новой коронавирусной инфекции (COVID-19) на территории Чувашской Республики» указĕпе килĕшÿллĕн, религи йăли-йĕркине массăл­лăн ирттерме тата çăва çине ирĕклĕн çÿреме чарнă. Çынна пытарма та çывăх тăванĕсене кăна кайма сĕннĕ.

Муркаш районĕнчи Йÿçкассинчи чиркÿ настоятелĕ Сергий атте пĕлтернĕ тăрăх, ко­ронавирус инфекцийĕ сарăлма тытăнсанах районти чиркÿ настоятелĕсем унта çÿрекен çынсене асăрхаттарса каланă. Чир-чĕр пал­лисем пуррисен, кĕлетке температури хăпар­нисен, аслă çулти (риск ушкăнĕ – 65 çултан аслăраххисем) çынсен чиркĕве тухмалла маррине пĕлтернĕ.

«Çăва çине кайма чарнă чухне вилнĕ çын­семшĕн килте кĕлтумалла, Турра килте кĕл­тумалла. Çăва çине вара каярах май килнипе кайса килме пулать. Çыннăн вилтăпри çине ăна пăхса тирпейлесе тăма çуталăкра пĕр кун кăна мар, ытти кун та кайма пулать», – палăртрĕ Сергий атте.

Н. НИКОЛАЕВА