Чÿрече анинче ÿстерекен хĕрлĕ хаяр пăрăç чечек пекех хитре курăнать. Ăна ÿстерекен кил хĕрарăмĕсем усăллă теççĕ ăна. Çак пăрăçа тухăçлă туса илмелли вăрттăнлăхсем чылай-и?

Владимир СКВОРЦОВ.

Вулавçă тĕрĕсех асăрханă. Чÿрече анинче çитĕнтернĕ хĕрлĕ хаяр пăрăç пÿрте илем кÿрет çеç мар, унăн усси те пысăк. Çак культурăна хура тăпра тултарнă чÿлмеке акма сĕнетĕп. Енчен те сирĕн пÿлĕмре тутлă пăрăç калчи те ÿсет пулсан, унпа пĕрле хутăш шăркаланасран хаяр пăрăçа ÿссе çитсен урăх пÿлĕме вырнаçтарма тăрăшăр. Пÿлĕмри хĕрлĕ пăрăç ачаш пулмантан ăна ÿстерме те кăткăсах мар. Хаяр пăрăç – нумай çул ÿсекен культура. Пĕр тĕм 5 çул хушши чип-чиперех çимĕç пама пултарать. Турачĕсем чĕрĕлсе анасран пĕчĕк тĕревсем вырнаçтарма ан манăр çеç.

Юрий ВЯЗОВ, пахчаçă.