Правительство ҫуртӗнчи эрнесерен иртекен планеркӑра республикӑн вӗренӳ министрӗ Дмитрий Захаров Чӑваш Ен Пуҫлӑхне Олег Николаева вӗренӳ организацийӗсем пӗрремӗш класа килекенсене йышӑнас кампание хатӗрри пирки пӗлтернӗ. Кӑҫал ашшӗ-амӑшне меллӗ пултӑр тесе пӗрремӗш класа килекенсене ҫырмалли официаллӑ старта канмалли куна – март уйӑхӗн 28-мӗшӗнчи шӑматкуна – палӑртнӑ.

«Парта хушшине 13 пин ытла ача ларӗ. Пирӗн пӗрлехи тӗллев – вӗренме кӗмелли процеса кашни ҫемьешӗн май килнӗ таран хӑтлӑ тӑвасси», – палӑртрӗ Олег Николаев. Заявленисене йышӑнасси яланхи пекех икӗ тапхӑрпа иртӗ. Пӗрремӗшӗ – март уйӑхӗн 28-мӗшӗнчен пуҫласа июнь уйӑхӗн 30-мӗшӗччен: пурӑнакан вырӑнти шкула каякансемшӗн е ҫӑмӑллӑхсем пуррисемшӗн. Иккӗмӗш тапхӑр июль уйӑхӗн 6-мӗшӗнче пуҫланать те сентябрь уйӑхӗн 5-мӗшӗнче вӗҫленет. Ҫак тапхӑрта документсене территори ҫыхӑнӑвне шута илмесӗр пушӑ вырӑнсем пулсан кирек хӑш шкула та пама пулать. Палӑртмалла: пӗрремӗш класра вӗренекен ҫӑмӑллӑхҫӑсене ашшӗ-амӑшӗ заявлени панӑ куна пӑхмасӑр приоритетлӑ йӗркепе вӗренме илӗҫ. Кирек мӗнле меллӗ хутшӑну форматне те суйлама пулать: «Госуслуги» портал урлӑ, шкула кайса, МФЦ урлӑ е документсене заказлӑ ҫырупа ярса пама юрать.