Паттăр ентешĕсене Сергей Харькова тата Николай Скворцова асăнса Тăван çĕршыв хÿтĕлевçин кунĕнче – февралĕн 23-мĕшĕнче Хорнуйĕнче Муркаш муниципалитет округĕн территори пайĕпе депутатсен муниципалитет округ Пухăвĕн вырăнти депутачĕ Александр Сидюшкин йĕркеленипе йăлана кĕнĕ спартакиада кăçалхипе 14-мĕш хут ирттернĕ.

Ăмăртусенче Хорнуй ялĕн урамĕсен пĕрлештернĕ командисем вăй виçнĕ. Командăсем йĕлтĕрпе чупассипе, Скандинави мелĕпе утассипе, мини-футболла выляссипе, канат туртассипе, дартс енĕпе, пневматика винтовкинчен тĕл перессипе, шашкăпа шахматла тата сĕтел çи теннисла выляссипе ăмăртнă.

Малти вырăна Первомайская урам команди çĕнсе илме пултарнă. Хыççăнхисем – Школьная тата Садовая урамсен командисем. Çĕнтерÿçĕсем дипломсемпе парнесене тивĕçнĕ. Уйрăм тав сăмахĕ спонсорсене – С. Харьковпа Н. Скворцов тăванĕсене.