Кун йĕркине çĕнĕлĕхсем кĕрсе пынă май социаллă пурнăç та пĕр вырăнта тăмасть. Çавна май пурнăçра тĕрлĕ сăлтавпа йывăр лару-тăрăва кĕрсе ÿкнисене пулăшасси те вăй илсех пырать. Пулăшу пирки калама пулать-ха та, анчах ĕçне тăвас тесен... Черетлĕ çулталăк вĕçленсе пынă май "Моргаушская" чăх-чĕп фабрики сăмаха ĕç çине куçарчĕ. Акционерсен уçă обществин генеральнăй директорĕ А. Константинов тăрăшнипе чăх-чĕп фабрикипе Пăрачкаври ача-пăча çурчĕ хушшинче туслă çыхăну никĕсленчĕ.
Раштавăн 26-мĕшĕнче чăх-чĕп фабрикин ĕç ушкăнĕ Çĕнĕ çул парнисемпе (канфетсемпе улма-çырла тата чăх-чĕп çăмартин пысăк партийĕ) ача-пăча çуртне çитсе килчĕ. Муркашсен кучченеçĕсене пăрачкавсем хапăлласах йышăннă.
- Раççейре те, республиăкра та пулăшу юхăмĕ вăй илсе пырать. Çапла вара эпир те хамăрăн пулăшас тĕллевпе Пăрачкаври ача-пăча çурчĕ çинче чарăнтăмăр. Пĕрремĕш кайсах унти директорпа М. Архиповăпа çитес çулхи ĕç планĕсене пăхса тухрăмăр. Хамăр енчен илсен эпир унта кашни уйăхрах çитсе килес ĕмĕтлĕ, - терĕ хаçат вулакансене Çĕнĕ çулпа саламласа чăх-чĕп фабрикин ертÿçи Андриян Николаевич.
А. БЕЛОВ.
